نگران وزیراعلیٰ کے پی کی تقرری کا معاملہ، سابق وزیراعلیٰ اور اپوزیشن لیڈر میں اہم ملاقات آج ہوگی

 ads

نئے نگران وزیراعلیٰ کی تقرری کیلئے محمود خان اور اکرم درانی نے 3 دن میں ایک نام فائنل کرنا ہے۔ فوٹو فائل

نگران وزیراعلیٰ خیبر پختونخوا اعظم خان کے انتقال کے بعد پیدا ہونے والے سیاسی بحران کے حل اور نئے وزیراعلیٰ کی تقرری پر مشاورت کے لیے سابق وزیراعلیٰ محمود خان اور اپوزیشن لیڈر اکرم خان درانی کے درمیان آج ملاقات ہو گی۔

نگران وزیر اعلیٰ خیبرپختونخوا کی تقرری کے معاملے پر آج سی ایم ہاؤس میں اہم ملاقات ہو گی جس میں سابق وزیراعلیٰ محمود خان اور اپوزیشن لیڈراکرم درانی شریک ہوں گے۔

سرکاری ذرائع کے مطابق ملاقات میں نئے نگران وزیر اعلیٰ کی تقرری پر مشاورت کی جائے گی، نگران وزیراعلیٰ کی تقرری کیلئے 3 دن میں دونوں کو ایک نام فائنل کرنا ہو گا۔

ads

گزشتہ روز نگران وزیراعلیٰ اعظم خان دل کا دورہ پڑنے سے انتقال کر گئے تھے جن کی نماز جنازہ چار سدہ میں ان کے آبائی علاقے میں ادا کی گئی تھی۔

ایڈووکیٹ جنرل کے پی کی گورنر کو قانونی رائے

عظم خان کے انتقال کے بعد ایڈووکیٹ جنرل خیبرپختونخوا نے گورنر خیبر پختونخوا غلام علی کو خط لکھ کر قانونی رائے پیش کی تھی۔

خط میں کہا گیا تھا کہ نگران وزیراعلیٰ کی وفات پر نگران وزیر اعلیٰ کے عہدے پر آئین خاموش ہے، ایسی صورتحال میں آرٹیکل 224 پر عمل درآمد کرنے کا مشورہ دیتا ہوں، نئے نگران وزیراعلیٰ کی تقرری کیلئے سابق وزیر اعلیٰ اور اپوزیشن لیڈر کو مدعو کیا جائے اور نئے نگران وزیر اعلیٰ کی تقرری کا عمل 3 دن کے اندر مکمل کیا جائے۔

گورنر کے پی کا محمود خان اور اکرم درانی کو خط

ads

ایڈووکیٹ جنرل کے پی کی قانونی رائے کے بعد گورنر پختونخوا غلام علی نے سابق وزیراعلیٰ محمود خان اور اپوزیشن لیڈر اکرم خان درانی کو خط لکھ دیا۔

گورنر کے پی نے سابق وزیراعلیٰ محمود خان اور اپوزیشن لیڈر اکرم خان درانی کو مشاورت کیلئے سی ایم ہاؤس مدعو کیا ہے۔

خط میں کہا گیا ہے کہ آئین کے آرٹیکل 224 کے تحت نئے نگران وزیر اعلیٰ کو منتخب کریں گے، اس حوالے سے سی ایم ہاؤس کے پی میں اجلاس ہو گا۔

گورنر خیبر پختونخوا کی جانب سے لکھے گئے خط میں کہا گیا ہے کہ اجلاس میں 3 دن کے اندر نئے نگران وزیر اعلیٰ کے انتخاب سےمتعلق فیصلہ کریں گے، انتخابات کی تاریخ مقرر ہے لہذا نئے نگران وزیر اعلیٰ کے لیے جلد مشاورت کی جائے گی۔

محمود خان اور اکرم درانی نے وزیراعلیٰ کا انتخاب کیا تو عدالت جائیں گے: پی ٹی آئی

دوسری جانب پاکستان تحریک انصاف نے سابق وزیراعلیٰ محمود خان اور اکرم درانی کی جانب سے نگران وزیراعلیٰ کے انتخاب کی صورت میں عدالت جانے کا اعلان کر دیا۔

نائب صدر پی ٹی آئی خیبرپختونخوا ظاہر شاہ طورو نے جیو نیوز سے گفتگو کرتے

ads

 ہوئے کہا ہے کہ گورنر نے کس قانون کے تحت محمود خان اور اکرم درانی کو وزیراعلیٰ کے انتخاب سے متعلق خط لکھا ہے، محمود خان وزیراعلیٰ ہے نہ ہی اکرم درانی اپوزیشن لیڈر ہے۔

ظاہر شاہ طورو کا کہنا ہے کہ محمود خان اور اکرم درانی کا منتخب کردہ نگران وزیراعلیٰ کسی صورت قبول نہیں ہو گا، اس معاملے کو آئین کے تحت حل کیا جائے، محمود خان اور اکرم درانی نے نگران وزیراعلیٰ کا انتخاب کیا تو اس کے خلاف عدالت جائیں گے۔

ads